Amasyalıdır. Fağfûr Paşa evlâdından oldukları anlaşılan Hasan Çelebi bin Sefer Bey’in mahdûmudur. Hacı Hamza [291] Mahallesi’nde mukîm olup gençliğinde sipâhî olarak yüz yirminci bölüğe kayd edildi. 1030’da Lehistân Harbi’nde yararlığı görüldüğünden terakkî edib 1035’de Amasya sancâğı cizye-i gebrân tahsîldârı oldu.
1040’da Lâdikli Kurd Ağazâde Bayram Paşa’nın dâ’iresine girip vekîl-harcı, 1046’da sadâretinde kapıcılar kethüdâsı oldu. 1048’de sadr-ı müşarün-ileyhin irtihâlinde Amasya kethüdâyeri ve 1054’de Ankebût Ahmed Paşa Amasya mutasarrıfı oldukta kethüdâsı ve 1055 senesi şevvâlinde tarafından Amasya mütesellimi oldu.
1056 senesi zilhiccesinde Ahmed Paşa Sivas Beylerbeyi oldukta tarafından Sivas mütesellimi ve 1058 şa’bânında yine müşarün-ileyh tarafından sânîyen Amasya mütesellimi oldu. 1059 senesi muharreminde paşa Anadolu ser-askeri olarak Girid harbine me’mûr oldukta beraber gitdi. Birkaç mâh sonra avdet etdi.
1059 senesi recebinde Anadolu Beylerbeyi olan Köprülü Mehmed Paşa ber-vech-i hâs Amasya mutasarrıfı oldukta tarafından sâlisen Amasya mütesellimi olduğu gibi 1060 senesi şa’bânında Ankebût [292] Ahmed Paşa vezâretle Boğaz muhâfızı ve Amasya mutasarrıfı oldukta râbi’an Amasya mütesellimi oldu. 1063 senesi şevvâlinin selhinde infisâl etdi.
Ba’dehû Ankebût Ahmed Paşa’nın kethüdâsı olup tarafından Kayseriyye sancâğı mütesellimi ve 1064’de Budin vilâyeti vâlî kâ’im-makâmı ve 1067 şa’bânında Ahmed Paşa, Köprülü Paşa tarafından kâ’im-makâm-ı sadr-ı âlî oldukta sadâret kethüdâsı vekîli oldu.
Ancak Kara Hasanzâde Hüseyin Ağa’nın teşebbüsâtından dolayı Ahmed Paşa Konya vâlîliğine gönderildikte beraber gidip 1070 senesi recebinde kendi ricâsıyla surre-i hümâyûn emîni olarak Hicâz’a gitdi. 1071 senesi rebîülevvelinde Amasya’ya avdet edib 1072 senesi evâ’ilinde vefât etdi.
Âkil, kâmil, müdebbir, kerîm, hânedân, hayır-hâh idi. Hacı Hamza Mescid-i şerîfini müceddeden i’mâr edib kurbunda mu’azzam bir mekteb ve bunun aşağısında el-yevm “Sefer Ağa Çeşmesi” demekle meşhûr âlî bir çeşme yaptırdı. Vefâtından [293] mukaddem mikdâr-ı kâfî nukûd vakf ederek nemâsından Gümüşlüzâde Câmi-i şerîfi kürsî şeyhliğine vazîfe ta’yîn etdi.
Mahdûmları Hasan, Ali, Osmân Ağalardır. El-Hâc Hasan Ağa, Baydurdlu Ahmed Ağa’nın dâmâdı olup mahdûmları İlçi Mehmed Paşa ile Defterdâr Mustafa Efendi’dir. Ali Ağa da Firârî Mustafa Paşa’nın hemşîresiyle te’ehhül edib mahdûmu Defterdâr Sarı Mustafa Paşa’dır. Diğer mahdûmu da Türk Mehmed Paşa’dır.
Osmân Ağa da ricâlden olup mahdûmları Halîl, Sefer, Mustafa Ağalardır. Sefer Ağa “Kazancı, Kazgancı” demekle de meşhûr idi. Osmân Ağazâde Sefer Ağa da sipâhî olup 1121’de Rus harbinde vefât etdi.