Amasyalıdır. Mevlânâ Abdülmelik bin Bahşâyiş Çelebi mahdûmu olup ceddinin terceme-i hâli yukarıda geçti. Allâme Sa’deddîn Taftazânî telâmizesinden Mevlânâ Sinâneddîn Yûsuf Çelebi’den ikmâl-i tahsîl edib Amasya’da ders-i âm ve müdderris-i be-nâm oldu.
842’de “Menârü’l-Usûl”ün şerhini ikmâl ederek fevka’l-âde [418] iştihâr edib Amasya müftülüğüne nasb edildi. Yıllarca tedrîs u iftâ ile iştigâl edib pek çok ulemâ ve kudât yetişdirdi. 857 senesi hilâlinde vefât etdi.
“Nukûdü’l-Lisân” da bu zâtın tercemesi yazılmış olup bilâd-ı Arabiyyeye seyâhat ederek ulemâsından ahz-ı ulûm ve sonra Amasya’da ikâmet ve iftâ ve tedrîse mülâzemet eden meşâhîr-i fuzalâdan olduğu mezkûrdur. Tilmîzlerinden Mevlânâ “Abdî-i Âmâsî” demekle meşhûr Abdülkerîm bin Abdülganî el-Amâsî de fuzalâdandır.