Amasya’nın Varay nâhiyesi Türklerinden Artuk bin Boğa oğludur. Sipâhîlikle 641 vak’asında Selçukîlere hizmet etdiğinden Varay ve Turhal taraflarında şöhret kazandı. Ba’dehû Varay emîri oldu.
Amasya kâdı’l-kudâtı Fahreddîn Mehmed Râzî’ye intisâb edib müşârün-ileyhin Konya’da sâhib-i a’zam olduğu esnâda ma’iyyetinde hizmet ederek kibâr-ı ümerâdan oldu. Ba’dehû Kayseriyye emîri olarak iştihâr etdi. 675 sâlinden sonra vefât eyledi. Mahdûmları Ca’fer, Halîl Beylerdir.
Ca’fer Bey, pederinin vefâtında Kayseriyye emîri oldu. Bunun mahdûmu Sivas eyâleti hükümdârı Sultân Alâaddîn Eretnâ Han’dır. Sâhib-i tercemenin nâmıyla meşhûr olan Kara İbrâhim çiftliği de Amasya dâhilinde olup[6] Sultân Eretnâ’nın evlâdına intikâl ederek Eretnâzâde Mehmed Bey vakf etdi.