Amasyalıdır. Hatîb-i meşhûr Mevlânâ Hayreddîn Halîl bin Mehmed el-Habbâzî’nin mahdûmudur. Amasya’da ulemâdan bi’t-tahsîl Bursa’ya gidip Mevlânâ Yegân Mehmed bin Armağan’dan ikmâl-i tahsîl ederek ders-i âm ve müderris oldu.
Yıllarca tedrîs-i ulûm ederek fezâ’il-i ilmiyyesi ma’lûm-ı Sultân Murâd Han oldukta hakkında ri’âyetler edib Sultâniyye medresesini ve ba’dehû yevmî yüz otuz akçe ile İznik’te Orhâniye medresesini verdi.
838’de Şehzâde Sultân Ahmed mu’allimi olarak beraber Amasya’ya geldi. Müşârün-ileyhin irtihâlinde Şehzâde Sultân Alâaddîn Bey’e mu’allim olup Amasya’da kaldı.
846’da müşârün-ileyhin ihnâkında sânîyen Orhâniye-i İznik müderrisi olup oraya gitdi. 856’da orada vefât etdi. Kibâr-ı fuzalâdan, müttakî, fakîh, kâmil bir zât idi. [11]
Mahdûmlarından Mevlânâ Zeyneddîn Halîl Çelebi kibâr-ı ulemâdan olup Amasya’da müderris ve müftü oldu. Diğeri Mevlânâ Muhyiddîn Mehmed Çelebi olup Fâtih Sultân Mehmed Han’ın mu’allimi olan bir allâme-i meşhûr idi.