Amasyalıdır. İltegin Gâzi evlâdından Emîr Gıyâseddîn [4] Mahmûd bin Emîr Şerefeddîn Mehmed bin emîr-i kebîr Hüsâmü’d-devle Hasan Gâzi bin emîr-i kebîr Nâsıru’d-devle İltegin Gâzi mahdûmudur. Amasya vâlîsi ve hükümdârı Sultân Nâsıreddîn Süleyman bin Sencer Şâh-ı Selçukî hizmetinde büyüdü.
Ba’dehû Sultân İzzeddîn Keykâvûs tarafdârı olup Amasya’nın merkez-i hükûmete iltihâkında, ba’dehû Rûmlar’a karşı Amasya’yı müdâfa’a ederek Canik ile Sinop’un fethinde büyük fedâkârâne yararlıklar gösterip nâ’il-i emâret oldu.
616’da Sultân Alâaddîn Keykubâd’ın cülûsunda ma’iyyet-i ümerâsından olup terakkî ederek 627’de pervâne-i sultânî ya’nî başmabeynci ve ser-kurenâ oldu. Bu esnâda Şehzâde Keyhüsrev’in lalası ve müdebbir-i umûru olan Emîr Sa’deddîn Köpek Bey’i gücendirmişti.
634 senesi şevvâlinde Sultân Alâaddîn Keykubâd’ın mesmûmen vefâtıyla Sultân Gıyâseddîn Keyhüsrev’in cülûsunda Emîr Sa’deddîn Köpek sâhib-i a’zam olduğundan Ankara vâlîsi olarak merkez-i saltanattan uzaklaşdırıldı.
Sa’deddîn Köpek, müşârün-ileyhi bir takım tezvîrât ile [5] gözden düşürüp 637 senesi rebiülevvelinde i’dâm etdirdi. Değerli, sâdık, şecî’ bir emîr idi. Bunun i’dâmından Baba İshâk Kefersûdî istifâde etmişdi.