Hakalalıdır. Amasya civârında Hakala nâhiyesinde kâ’in zâviye-i Rifâ’iyye şeyhi es-Seyyid Hâşim Çelebi bin es-Seyyid [159] Yahyâ Çelebi bin sâhibü’l-hâl es-Seyyid Ahmed el-Kebîr er-Rifâ’î mahdûmudur. Pederinin hayâtında Amasya ulemâsından ulûm-ı şer’iyye ve edebiyyeyi ahz edib Hakala’da neşre çalışdı. Pederinin vefâtında ceddi Seyyid Yahyâ’nın zâviyesi şeyhi ve vakfı mütevellîsi olup fevka’l-âde iştihâr etdi.
Çelebi Sultân Mehmed Hân devrinde ammizâdesi es-Seyyid eş-Şeyh Hüsâmeddîn er-Rifâ’înin vefâtından sonra Amasya’da ikâmet ve zâviye-i Hüsâmiyyeyi ihyâ ederek 826’da vefât etdi. Hakala’da ceddinin türbesi civârında medfûndur. Ulemâ ve sulehâdan bir şeyh-i be-nâm idi. Mahdûmu es-Seyyid Abdülkerîm Çelebi’dir. ⁷⁹