Lâdik kurbunda Ahmedsarây nâhiyesinde medfûn olan es-Seyyid Sadreddîn Kâsım er-Rifâ’î evlâdından es-Seyyid Abdurrahîm Çelebi bin es-Seyyid İzzeddîn Hasan Çelebi bin es-Seyyid Sadreddîn Kâsım bin Sâhibü’l-hâl es-Seyyid Ahmed el-Kebîr er-Rifâ’î mahdûmudur.
Ahmedsarây’da doğdu. Amasya’da tahsîl-i ulûm [160] edib avdet ederek pederinin irtihâlinde Ahmedsarây’da Seyyid Kâsım Zâviyesi şeyhi oldu. Ahvâl ü etvâr-ı zâhidânesi Amasya’da vâlî olan Sultân Bâyezîd-i Sânî’nin ma’lûmu oldukta celb ü ikrâm etdi.
Ahmedsarây’ı fevka’l-âde şenlendirip 879 senesi saferinde vefât etdi. Meşâyih-i Rifâ’iyyenin sulehâsından ve ulemâsından, zâhid, halûk, mükerrem, edîb, şâir olup “Ahmedî” demekle meşhûr idi. Mahdûm-ı yegânesi es-Seyyid Yahyâ Çelebi yerine kâ’im olup 895 senesi evâsıt-ı şevvâlinde vefât etdi. Pederinin yanında medfûndur.
Bunun oğulları es-Seyyid Tâceddîn, Muhyiddîn, Sâlih Çelebilerdir. Es-Seyyid Tâceddîn Çelebi pederinden bir kaç yıl sonra vefât etdi. Es-Seyyid Muhyiddîn Mehmed Çelebi, Lâdik’te ikâmet edib mahdûmu Seyyid Hân Çelebi’dir. Es-Seyyid Sâlih Çelebi de Hakala’ya gelip ikâmet etdi. Bunun mahdûmu es-Seyyid Yahyâ Çelebi’dir. Bunun hâfîdi fâzıl-ı meşhûr es-Seyyid Muhyiddîn Mehmed Efendi bin es-Seyyid Sâlih bin es-Seyyid Yahyâ Çelebi’dir. [161]