Amasyalıdır. “Ümm-i Veled” demekle meşhûr Hüsâmeddîn Hüseyin bin Hasan bin Hâmid-i Tebrîzî mahdûmudur. Amasya bağları üstünde İltekin kasabasında doğdu. Bir müddet Amasya’da tahsîl-i ulûm edib sonra İstanbul’a gitdi. Orada ikmâl-i tahsîl etdi.
Ba’dehû Amasya’ya avdet ve İltekin kasabasında ikâmet ederek orada tedrîs-i ulûm etdiği esnâda ilm ü nücûma dâ’ir “El-kâsidetü’l-Garrâ fî Harekâti’s-Semâvâti Turrâ” risâle-i manzûmesini te’lîf ve 882’de Sultân Fâtih’e takdîm ederek Amasya’da Hüsâmiyye müderrisliğine nâ’il oldu.
886’da Sultân Bâyezîd-i Sânî tahta cülûs etdikte şehzâdesi olan Amasya vâlîsi Sultân Ahmed’e takarrüb edib 890’da Yörgüç Paşa müderrisi ve 896’da sünnet düğünü vak’asında Çorumlu kadısı olup Amasya’dan kaldırıldı.
903’de yine Amasya’ya gelip Şehzâde Sultân Ahmed’in himâyesine dehâlet etdi. Bir müddet de Mehmed Paşa müderrisi [162] ba’dehû bilâd-ı muhtelife kadısı olup 921’de vefât etdi. Âlim, kâmil, müşârik-i ulûm idi. Mahdûmu Abdülazîz Efendi Amasya müftüsü olup mevâlidendir. Bunun mahdûmu Ali Efendi de mevâlidendir.