Amasya’nın Yenice köyünde zâviyesi hücresinde medfûn olan sâdât-ı kirâm-ı Hüseyniyyeden Emîr Sadreddîn Mehmed bin Hüseyin bin Alî el-Horasânî mahdûmudur. Amasya’da ulemâdan tahsîl-i ilm ü kemâl edib ders-i âm ve Atabeg müderrisi oldu.

Ba’dehû Merzifon’da Sultân Mehmed Medresesi müderrisi olarak temâyüz etdi. 883’de Amasya vâlîsi iken Sultân Bâyezîd-i Sânî’ye mu’allim olup 886’da Sultân müşârun ileyhin tahta cülûsunda Bursa’da Sultân Murâd Medresesi müderrisi olduğu hâlde 890’da vefât etdi. Âlim, fâzıl müttakî bir seyyid-i zî-şân idi. Mahdûmu nakîbü’l-eşrâf Emîrî Mahmûd Efendi’dir.