Amasyalıdır. Baba İlyâs Horasânî evlâdından Kutlu Beyzâde Sultân Çelebi bin Ulu Bey bin Ahmed Şâh bin Hâce Alî Şâh bin Emîr Nûreddîn Kutlu Bey’in mahdûmudur. Kibâr-ı Cüneydiyyeden Şeyh Şâdî hulefâsından İnepazar’da neşr-i me’ârif-i sûfiyye eden Mahmûd Ata’nın halîfesidir.
Efte köyünde ikâmet ve çiftliği mahsûlünden bir zâviye binâsıyla orada icrâ-yı meşîhat, fukarâya bezl-i ta’âm, halkın ahlâkını tehzîbe hizmet ederek 871’de dâr-ı kudse rihlet etdi. Âlim, zâhid, sahî, pâk-i’tikâd idi. Zâviyesi önünde medfûn ve türbesi ziyâretgâh idi.
Baş ve karın ağrılarına, kızamık vesâ’ir emrâz-ı cildiyyeye [473] enfâs-ı şerîfesi ayn-i şifâ idi. Bundan dolayı bütün İnepazarı nâhiyesi halkının vesâ’ir ahâlî-i kurânın merci’i olmuşdu. Bu hâssa-i şifâ’iyye sülâlesi enfâsında bile müşâhede olunurdu.
Efte’de kâin çiftliği, zâviyesine vakfeylediğinden evlâdı neslen ba’de neslin bu vakfından yakın zamanlara kadar istifâde etmekte idiler. Mahdûmları Burhân, İlyâs Atalardır. Bunların evlâdından vâlidem Zâhide Hâtun binti el-Hâc Hâfız Osmân Efendi’nin vâlidesi Fatıma Hâtun binti el-Hâc Mehmed Ağa sâhib-i tercemenin evlâdından olduğu münâsebetle bu vakfından istifâde ederdi.