İçerişehir’de zâviyesi olan sâbıkü’t-terceme el-Hâc Bedreddîn [498] Mahmûd Çelebizâde Alâeddîn Alî Çelebi mahdûmudur. Amasya fuzalâsından tahsîl-i ulûm edib ders-i âm ve ba’dehû kasabâta kadı, 871’de Amasya’da kassâm-ı askerî, 883’de Amasya kadısı oldu. 890’da vefât etdi.
Kibâr-ı ulemâ ve kudâttan latîf, tevârih ve muhâzarâta vâkıf, hoş-sohbet bir zât idi. Çakal Kadı demekle meşhûr olup evlâdına Çakal Kadızâdeler ve tahfîfen Çakaloğulları ve Çakallar dendi.
Sultân Bâyezîd-i Sânî ve şehzâdesi Sultân Ahmed’e Amasya’da tekarrüb edib mutâyebât ve nevâdir-i asrında pek meşhûr idi. Mahdûmları el-Hâc Ali, Sâdullâh, Sinan Çelebilerdir. Hacı Alî Çelebizâde Şemseddîn Ahmed Çelebi ve birâderi el-Hâc Mahmûd Çelebi meşhûr idi. Bunun evlâdından Ahmed Efendi bin Vildân Çelebi mevâlîden idi.
Hacı Sinan Çelebi evlâdından Sinan Paşa bin el-Hâc Mahmûd Çelebi bin el-Hâc Alî Çelebi bin el-Hâc Sinan Çelebi bin Çakal Kadı Beylerbeyilerdendir. Bunun mahdûmları Mehmed [499] Mahmûd, Yûsuf Paşalar’dır. Bunların evlâdı münkarız olup tevliyet Rahtuvân Mehmed Paşazâdelere intikâl etdi.