Amasya meşâyih-i kirâmından ve kibâr-ı Halvetiyyeden Cemâlîzâde eş-Şeyh Cemâleddîn Mehmed Çelebi Halîfe bin Mahmûd Çelebi mahdûmu olup pederinden ulûm-i şer’iyye ve tasavvufu ahz ü tahsîl ederek hulefâ-yı Halvetiyyeden oldu.
Pederiyle beraber âzim-i Hicâz olup avdette Mısır’a uğradı. Orada kibâr-ı fuzalâ ve meşâyihden istifâde-i ulûm-i âliyye ederek Amasya’ya avdet etdi. 915’de ammizâdesi eş-Şeyh Muhyiddîn Mehmed Çelebi bin Kâsım Çelebi’nin irtihâli üzerine Hâce Sultân Zâviyesi şeyhi oldu.
On yedi yıl kadar icrâ-yı meşîhat ve irşâd-ı halâyık edib 932 hudûdunda vefât etdi. Âlim, fâzıl, gâyet müteşerri’, zâhid, vâ’iz, âbid bir zât-ı sütûde-simât idi. Amasya meşâyihinden ve pederinin hulefâsından eş-Şeyh Hayreddîn Hızır Efendi’nin dâmâdı olup mahdûmu da eş-Şeyh Hayreddîn Hızır Efendi’dir. Evlâdına Çelebizâdeler dendi. Zâviye civârında Taksim önünde medfûndur. [503]