Sivaslıdır. Ahmed oğludur. Orada fuzâlâ-yı kurrâdan Mevlânâ Ziyâeddîn Yûsuf er-Rûmî’den ilm-i kıraati ve Amasya’da [497] Mevlânâ Celâleddîn Abdurrahmân Çelebi bin Musliheddîn Mûsâ Çelebi’den ulûm-i şer’iyye ve edebiyyeyi ahz edib müşârün-ileyhe dâmâd oldu. İmzâsında Mahmûd bin Ahmed el-Muslihî yazardı.
Bir müddet neşr-i ulûma hizmet ederek ders-i âm oldu. Amasya’da ilm-i vücûh-i kıraat bundan intişâr etdi. Ba’dehû Atabeg Gâzi müderrisi, Amasya nâibi olup kayın birâderi Amasya kâdı’l-kudâtı Mevlânâ Şemseddîn Mehmed Şâh Çelebi’ye niyâbet ve 823 sâlinden sonra dâr-ı bekâya rihlet etdi. Üçler’de kayın pederinin yanında medfûndur. Kibâr-ı ulemâdan şeyhü’l-kurrâ bir zât idi.
Amasya’da zâviyesi ve imârethânesi olan ricâlden Bedreddîn Mahmûd Çelebi Ahî Darbhâneci’nin terceme-i hâli yukarıda Ahî Darb-hâneci Bedreddîn Mahmûd Çelebi diye yazıldı. Meşâhîr-i ulemâdan Osmâncıklı Bedreddîn Mahmûd Çelebi bin Alî de 886 sâline doğru dâr-ı bekâya irtihâl etdi. Vâ’iz, fâzıl bir zât idi.