Amasyalıdır. Halfet Gâzi Türbesi karşısındaki çeşme bânisi olan kâdı’l-kudât Mü’eyyedüddîn Mehmed bin kâdı’l-kudât İmadeddîn Ömer bin kâdı’l-kudât Şemseddîn Mehmed bin Mevlânâ Necîbeddîn Mûsâ bin Mehmed bin Mahmûd’un mahdûmudur.
Ba’de’t-tahsîl 771’de ders-i âm, 776’da Medrese-i Halifiyye Halfet Gâzi müderrisi, pederinin vefâtında Amasya kâdı’l-kudâtı oldu. Emîr-i kebîr Fahreddîn Ahmed Paşa’nın devrinde ma’zûl olup yıllarca açıkta kaldı.
Ba’dehû Tokat Kadısı olup taşra gönderildi. 805’de oradan da azledilip Amasya’ya geldikde İçerişehir’de âlî bir zâviye ve imâret-hâne binâ ederek 807’de emlâk-ı mevcûdesini bu hayrâtının mesâlihine vakfedip 808 senesi recebinde vefât etdi. [496]
Âlim, kâmil, sâhib-i hayrât bir zât-ı sütûde-simât idi. Mezkûr çeşme ittisâlinde olan Kadılar Türbesi’nde medfûndur. Seng-i mezârında şöyle yazılıdır: Hâzâ merkadü’l-merhûm el-Hâc Mahmûd bin Mehmed el-Kâdî hüve ve ebûhü ğufira lehümâ kad irtehale fî-şehri receb sene semânin ve semâniye mi’e.¹⁹¹
Vakfiyesinin unvânında da şu yazılıdır: es-Sadrü’l-imâmü’l-hümâm iftihâru’l-kudât ve’l-hukkâm halefu’l-ekâbîr ve’l-mevâliyyü’l-izâm zâ’irü Beyti’llâhi’l-haram ve ravzâti Nebiyyihî Muhammed aleyhi’s-selâm bedrü’l-milleti ve’d-dîn el-Hâc Mahmûd Çelebi bin el-Kâdi el-merhûm Mü’eyyidü’d-dîn Mehmed bin el-Mevlâ el-Kâdî es-Sa’îdü’l-Mağfûr lehû imâdü’l-milleti ve’d-dîn.¹⁹²
Mahdûmları Pîr Mehmed, Ali, Ahmed Çelebilerdir. Bunlar da meşâhîr-i kudâttan idiler. Alâeddîn Alî Çelebizâde Bedreddîn Mahmûd Çelebi de kibâr-ı ulemâ ve kudâttan olup tevliyet bunun evlâdına intikâl etmişdi. Bunlara Çakal Kadızâdeler ve kısaca Çakallar dendi.