Amasyalıdır. Hacı İlyâs Mahallesi eşrâfından el-Hâc Alî Ağa bin el-Hâc Mansûr Ağa’nın oğludur. Ceddi Amasya şehir kethüdâlığı ile iştihâr etmişdi. Kendisi pederinin irtihâlinde meclis-i a’yân a’zâsı ve mükerreren Amasya şehir kethüdâsı oldu. Bundan akdem Hicâz’a gitmişti.
1112’de vezâretle Şâm vâlîsi ve emîrü’l-Hâc olan akrabâsından Amasyalı Sefer Ağazâde el-Hâc Mehmed Paşa’nın²³⁶ surre-i hümâyûn kethüdâsı olup ma’iyyetinde Hicâz’a gitdi. Ba’de’l-Hâc avdette surre-i hümâyûn kâfilesine ta’arruz eden eşkiyâ-yı urbân elinde 1113 senesi saferinin evâ’ilinde şehîden vefât etdi. [250]
Kerîm, hânedân bir zât idi. Mahdûmları Ahmed, Mehmed, Mustafa, Alî Ağalardır. El-Hâc Ahmed Ağa Amasya mütesellimi olup 1140’da vefât etdi. Mahdûmları Abdulkâdir, Mehmed Ağalardır. El-Hâc Mehmed Ağa’nın mahdûmu Alî Efendi hâcegân-ı dîvân-ı hümâyûndandır.
El-Hâc Mustafa Ağa Amasya eşrâfından olup, 1143’de vefât etdi. Mahdûmları el-Hâc Hâfız Mehmed, Hüseyin Ağalardır. Hacı Hâfız Mehmed Ağa 1177’de vefât edib mahdûmları es-Seyyid Ahmed, Mustafa, Abdülkâdir, Osmân, Ebûbekir Ağalardır.
Köse Alî Ağa rikâb-ı hümâyûn ağalarından iken vezîr olan Köse Alî Paşa’dır. 1164’de vefât edib mahdûmu Abdulkâdir Bey dergâh-ı âlî kapıcı-başılarındandır. Bunun mahdûmu Alî Azîz Bey 1227 senesi şevvâlinde vefât etdi.
El-Hâc Hüseyin Ağa bin el-Hâc Mustafa Ağa rikâb-ı hümâyûn ve sadr-ı âlî kethüdâsı olan Büyük Hüseyin Ağa olup 1188’de vefât etdi. Mahdûmları [251]Mustafa, Ahmed Reşîd, İbrâhim Rüşdü Beylerdir. Bunların mecmû’ına “Hacı Kadirzâdeler” dendi. Bunlardan Abdulkâdir Efendi bin Ahmed Ağa da ricâl-i devlettendir.
Amasya’da Hacı Kadirzâdeler 1177’de vefât eden Hacı Hâfız Mehmed Ağa’nın evlâdıdır. Bunlardan Amasya evkâf başkâtibi Hacı Mehmed Nûrî Efendi bin el-Hâc es-Seyyid Ahmed Efendi bin el-Hâc es-Seyyid Mehmed Ağa bin es-Seyyid Ahmed Ağa bin el-Hâc Hâfız Mehmed Ağa 1331 vefât etdi. Eşrâf-ı ulemâdan idi.