Amasyalıdır. Etmekçi Halîl’in mahdûmudur. Halk arasında Etmekçizâde ve beyne’l-ulemâ “Habbâzî Çelebi” dendi. Amasya’da mukaddimât-ı ulûmu görüp Ziyârîzâde Mevlânâ Sâ’ideddîn Mevhûb ile Kayseriyye’ye gitdi.
Orada Mevlânâ Hüsâmeddîn Hasan bin Ömer bin İshâk el-Kayserî’den ulûm-ı şer’iyye ve akliyyeyi tahsîl ederek avdet edib Amasya’da tedrîs-i ulûma başladı. Yıllarca ders-i âm olarak neşr-i ma’ârife himmet edib Amasya [257] hükümdârı Hacı Şâdgeldi Paşa’nın nâ’il-i iltifâtı oldu.
Bir müddet Amasya kâdı’l-kudâtı Mevlânâ Mü’eyyideddîn Mehmed Çelebi’ye niyâbet edib 783 sâlinden sonra vefât etdi. Âlim, kâmil, fakîh bir zât-ı sütûde-simât idi. Mahdûmu eş-Şeyh Şemseddîn Ahmed Çelebi 807’de umdetü’l-fuzalâ’ ve kıdvetü’l-meşâyih idi.