Amasyalıdır. Sivas ve Amasya hükümdâr-ı meşhûru Sultân Alâeddîn Eretna Hân evlâdından Ahmed Bey bin Mehmed Bey bin Emîr Alâeddîn Ali Bey bin Emîr-i Kebîr Nâsıreddîn Mehmed Bey bin Sultân Eretna Hân’ın mâhdûmudur.
Amasya’nın İçeri şehrinde doğdu. Şehzâdegânın dâirelerinde hizmet ederek Amasya’da vâlî iken Şehzâde Alâeddîn Bey’e şarâbdâr oldu. 846’da müşârün-ileyhin ihnâkında bir müddet menkûb olup Hicâz’a gitdi. Avdetde kendi umûruyla iştigâl etdi.
855’de Sultân Mehmed Hân’ın cülûsunda nâil-i emâret [254] olup 857’de İstanbul’un fethinde isbât-ı liyâkat etdi. Pâdişâhın teveccühâtını kazanıb 858’de Amasya vâlîsi olan Sultân Bâyezîd-i Sânî’nin ma’iyyetine me’mûr oldu.
864’de Amasya Vilâyeti muhâfızı olup dokuz yıl kadar müstakîmâne ifâ-yı vazîfe etdi. 873’de Uzun Hasan Şâh’ın Anadolu’ya tecâvüzatı hissedildiğinden Tokat muhâfızı olup gitdi. 875’de Uzun Hasan’ın savletine karşı Tokat’ı müdâfaa edebildiyse de 876’da mağlûb ve esîr olup 877’de müteessiren vefât etdi.
Asîl, tab’an kerîm, sâhib-i hayr ü hasenât bir emîr-i nâmdâr idi. Amasya’da Hacı Hamza Bey Mahallesi bunun nâmına mensûb olup mahallesinde bir mescid-i şerîf ve civârında bir mekteb ve iki çeşme yaptırdı. Mescidi hazîresinde medfûn olduğu meşhûr ise de kabri bulunamadı.
878’de şu hayrât-ı şerîfenin evkâfını mahdûmları el-Hâc Ahmed, İsa, Mahmûd, Kâsım Beyler tanzîm ederek hayrâtını ihyâ etdi. İnepazar’da da bir câmi-i şerîfi ve çiftliği vardır. Vâlidesi Amasya Emîr-i Kebîri [255] Mustafa Bey bin beylerbeyi el-Hâc Şâdgeldi Paşazâde el-Hâc İsa Bey’in kerîmesi idi.
Evkâfına mütevellî olan Sarı Ahmedzâdeler emîr-i müşârün-ileyhin ahfâdındandır. Bunlardan Sarı Ahmedzâde Osmân Efendi’nin mahdûmu Ömer Efendi 1321’de ber-hayât idi. Amasya Müftî-i esbakı Sarı Ahmedzâde el-Hâc Hâfız Mehmed Efendi bunların ceddidir. Sarı Ahmedzâde diğer Hâfız Mehmed Efendi de kibâr-ı mevâlîden idi.