Köprülüdür. Arnavut olup Köprü voyvodası Kozlucalı Alî Ağa’nın mahdûmu ve Köprülü Mehmed Paşa’nın ana bir kardaşıdır. Çünkü Mehmed Paşa’nın vâlidesi Râziye Hâtun, pederi Hüseyin Ağa’nın vefâtında Kozlucalı Alî Ağa’ya varmış, ondan sâhib-i terceme olmuştu.
Sipâhî olup kardaşının sadâretinde sipâhî ocağına kethüdâ olarak “Amca” demekle iştihar etdi. Fakat birâderiyle aralarında üveylik adâveti olduğundan müşârün-ileyhin ve mahdûmlarının sadâretlerinde umduğu kadar ikbâl göremedi.
1082’de Kandiye’nin fethinde Girid Top-hâne nâzırı ve 1087 senesi recebinde ricasıyla surre-i hümâyûn emîni olup Hicâz’a gitdi. Avdette Merzifonî Kara Mustafa Paşa’nın lutfu sâyesinde kapıcıbaşı ve 1095’de mütekâ’id olup 1104 senesi şevvâlinde vefât etdi. [430]
Âlî-cenâb dîndâr, sâhib-i hayr bir zât idi. İstanbul’da bir mescidi, pederinin vatanı olan Yeni Pazar sancâğı dâhilinde kâ’in Kozluca kasabasında bir câmii ve mektebi ve bunları idâre edecek evkâfı kuyûd-ı vakfiye idâresinde mukayyeddir. Mahdûmu sadr-ı a’zam Amcazâde Hüseyin Paşa ve dâmâdı Enişte Alî Efendi bin Abdurrahmân Efendi’dir.