Amasya’nın Sade Helkis Mahallesi eşrâfından olup 1221’de vefât eden dergâh-ı âlî kapıcıbaşılarından el-Hâc Süleyman Ağa bin el-Hâc Alî Ağa’nın mahdûmudur. Pederinin vefâtında nüfûz u servetine vâris olduğundan hâciyân ve a’yân meclislerine a’zâ oldu.
1248’de Tazmînât-ı harbiyye i’ânâtında mebâliğ-i azîme bezl ü takdîm ederek devletin ve halkın teveccühâtını kazandı. 1256’da meclis-i idâre a’zâsı olup mükerreren intihâb [516] edilerek 1278’de vefât etdi. Gâyet zî-servet, sahî, hânedân idi.
Mahdûmu Mehmed Sâdık Efendi kendisine mîrâs kalan o servet-i azîmeyi, çiftlikât ü akarâtı sefâhet uğrunda ifnâ ederek mahallemizde bir kirâ-hânede kemâl-i zillet içinde cân verdi. Cenâzesi i’âne ile kaldırıldı. Oğulları Yâverân-ı kitâbetten askerî kâ’im-makâmı olan Mehmed Âdil Bey Bağdâd’da ve şehremâneti me’mûrlarından Ahmed Râsim Efendi İstanbul’da vefât etdi.