Amasyalıdır. Esbak nakîbü’l-eşrâf kâ’im-makâmı Çorumlu es-Seyyid Zeynel Âbidin Ağa’nın evlâdından es-Seyyid el-Hâc Süleyman Efendi bin es-Seyyid Alî Efendi’nin mahdûmudur.
Pederi Köprü’de me’mûr olduğu esnâda oranın ulemâsından İkincizâde Mustafa Tevfîk ve Mehmed Râşid Efendilerden ve sonra Köprü müftüsü Çelebizâde es-Seyyid Ahmed Es’ad Efendi’den ikmâl-i [525] tahsîl etdi.
Bir müddet Amasya’da ders-i âm olup sonra Fîrûz Ağa müderrisi olarak Havza’da ikâmet ve tedrîs-i ulûma mülâzemet etdi. Orada mahkeme teşkîlâtında mahkeme-i bidâyet a’zâsı ve müstantık olup 1303’de Havza müftüsü oldu.
1306’da Sivas vâlîsi Memduh Paşa’nın Havza’da binâ etdirdiği hamâmın hakkında mu’ârız olduğundan azl edildiyse de 1307’de Havza meclis idâresinin ricâsı üzerine taraf-ı meşîhatten sânîyen Havza müftülüğüne ta’yîn edildi.
Bundan sonra bir yıl daha makâm-ı fetvâda bulunup 1308 senesi gurre-i recebinin gecesinde vefât etdi. Âlim, fakîh, usûl u fürû’a vâkıf, zî-servet idi. Bir kerîmesini Havzalı Ömer Necâtî Efendi’ye tezvîc edib yerine Havza müftüsü oldu.