Amasya’nın Hızır Paşa Mahallesi’nde el-Hâc Ahmed Ağa’nın mahdûmudur. Sipâhî olup cerbeze ve şecâatle iştihâr edildiğinden tûl-i müddet meydân ağası oldu. Bu vazîfe kendisine lakâb olarak kaldı. Ok meydânı havâlîsinde [374] ufak bir hâdiseye meydân vermedi.
Bundan dolayı halk ve a’yânın muhabbet ve itimâdını kazanıb 1065 senesi muharreminde Amasya kethüdâyeri ve şevvâlinde Amasya sancâğı mütesellimi olarak temâyüz etdi. 1066 senesi muharreminde mutasarrıf Hasan Paşa’nın infisâline binâen ma’zûl ve şâbânında mütesellim kâ’im-makâmı oldu.
1067 senesi muharreminde mütesellim avdet etdiğinden idâreden çekilib 1068 senesi evâsıtında Tokat voyvadası ve Amasya beytü’l-mâl emîni oldu. 1069 senesi cumâdelûlâsında Abaza Hasan Paşa tarafdârı gösterildiğinden derhâl azl ve 20500 akçesi müsâdere edilerek menkûbâne halde bir müddet yaşadı. 1084 senesi evâilinde vefât etdi. Müdebbir, cesûr, şecî idi. Mahdûmu Mehmed Ağa’dır. Köprülü Mehmed Paşa’yı gücendirdiğinden terakkî edemedi.