Amasyalı Ahmed’in mahdûmudur. Yukarıda tercemesi yazılan Allâme Büyük Hızır Efendi’nin halka-yı tedrîsinde ikmâl-i tahsîl edib mücâz ve ders-i âm oldu. Hacı Sefer Ağa Surre Emini oldukda imâmı olup Hicâz’a beraber gitdi.
1074’de Hacı Sefer ve Ya’kûb Ağalar’ın Gümüşlüzâde Câmii şerîfine vaz‘ etdikleri va’zıyeye mutasarrıf olup üstâdının hayatında yıllarca fâzılâne tedrîs-i ulûm ederek Küçük Hızır Efendi demekle iştihâr etdi.
1086’da Halfet Gâzi müderrisi olup halka vaaz ve tezkîr, talebe-i ulûma fünûn-ı lâzimeyi ifâde ve tedrîs ile iştigâl edib 1104 senesi muharreminin onuncu günü dâr-ı mükâfâta irtihâl etdi. Üstâdının yanında medfûndur. Meşâhîr-i ulemâdan fâzıl, hâlûk, âmil bir zât idi. Mahdûmu el-Hâc Nuh Efendi olup bunun evlâdına Nuh Efendizâdeler dendi. [383]