Amasyalıdır. Eşrâfdan el-Hâc Feyzullah Efendizâde el-Hâc İsmail Efendi’nin mahdûmu ve Gül Ahmed Paşa’nın ammizâdesidir. Müşârün-ileyh Gül Ahmed Paşa bin Mehmed Efendi bin el-Hâc Feyzullah Efendi’nin ağalığında dâiresine girib tahsîl-i maârif etdi.
Ahmed Paşa vezâretle Cidde vâlîsi oldukda kethüdâsı olup Hicâz’a gitdi. Ammizâdesinin irtihâlinde avdet edib meclis-i hâciyân ve 1152’de meclis-i a’yân âzâsı ve 1159’da baş-a’yân oldu.
Nadir Şâh muhârebatında imdâd-ı seferî tedârikinde ibrâz-ı iktidâr eylediğinden 1160’da dergâh-ı âlî kapıcıbaşılığı ile taltîf edildi. 1161 şa’banında tedârik etdiği gönüllü askere baş-buğ olarak dârü’l-harbe [114] girib mâlen ve bedenen çalışdı.
1168 senesi muharreminde sânîyen baş-a’yân ve zilhiccesinde sânîyen Amasya mutasarrıfı Ebûbekir Paşa tarafından mütesellim olup 1170 senesi ramazânında Yozgatlı Ömer Paşa Amasya mutasarrıfı oldukda mütesellimlikde ibkâ eyledi.
1171 senesi rebîülevvelinde Ömer Paşazâde Hasan Paşa’nın mutasarrıflığında azl edilib 1173 senesi muharreminde Ebûbekir Paşa tarafından sâlisen Amasya mütesellimi olduğu halde 1174 senesi şa’banında hastalandı. Ramazânın gurresinde mütesellimlikden çekilib evâsıtında dâr-ı bekâya irtihâl etdi.
Âkil, müdebbir, nâfîzü’l-kelîm, servet ü sâmânı mükemmel, büyük bir hânedân idi. Gümüşlüzâde Mahallesi’ndeki mükellef konağı bir vezîr dâiresine benzerdi. Mahdûmları el-Hâc Yeğen Ali Paşa ile el-Hâc İsmail, Feyzullah Efendilerdir. Hacı İsmail Efendi ulemâdan olup 1200’de ve bunun mahdûmu Feyzullah Efendi de 1233’de vefât etdi. Dâmâdı da yeğeni olan el-Hâc Hüseyin Ağa’dır. Yeğen el-Hâc Ali Paşa da meşâhîr-i vüzerâdandır.[115]