Amasya’da câmii ve mahallesi olan Hoca el-Hâc Süleyman Çelebi bin Kemâleddîn Ahmed Çelebi bin Mevlânâ eş-Şeyh Hâmideddîn Abdülhâmid Hüsrevşâhî mahdûmudur. Meşâhîr-i hâcegân ve a’yân-ı ağniyâ ve ümenâdan olup bir müddet Şehzâde Sultân Ahmed’in defterdârı olarak fevkalâde iştihâr etdi. [616]
911’de Sığır Pazarı’nın altında Atabeg Medresesi civârında dil-nişîn bir câmii şerîf binâ ve 916’da emlâkini bunun mesâlihine vakf edib 917 senesi muharreminde vefât etdi. Hoca Süleyman Mahallesi’ndeki çarşıda on iki bâb dükkânı mevkûfâtındandır.
Umûr-i hesâbiyyede kâmil, afîf, sâhib-i hayrât bir zât-ı mekârim-simât idi. Câmii ğarbında kâin hazîrede medfûndur. Seng-i mezârı Uzunyol Mezârlığı’nda bulunub târîh-i vefâtı anlaşıldı. Halîlesi Kamer Hâtun binti Ebûbekir Bey de devr-hânlara emlâkini 913’de vakfetdi.
Mahdûmları Ahmed, Hüseyin Çelebilerdir. Dâmadı da defterdâr-ı meşhûr Amasyalı İskender Çelebi’dir. Hoca el-Hâc Ahmed Çelebizâde el-Hâc Mehmed Çelebi ve bunun mahdûmu Abdülcelâl Çelebi Sofular Mahallesi eşrâfından idi. Bunun mahdûmu el-Hâc Hüseyin Ağa’dır.