Hacıköylüdür. Oranın müftüsü olup tercemesi geçen Hâfız Mustafa Tevfîk Efendi bin Müftü el-Hâc İsmâ’îl Hakkı Efendi’nin mahdûmudur. 1288’de doğdu. Tahsîl-i ibtidâ’îsini Hâcıköyünde gördükten sonra Amasya’ya gelip Sultân Bâyezîd Medresesinde ikâmet ve ders-i âm Arhavili Muharrem Efendi’nin halka-i tedrîsine mülâzemet etdi.
Kibâr-ı fuzalâdan Mecdîzâde Hâfız Abdurrahmân Kâmil ve Köprülü Hacı Hâfız Mustafa Tevfîk Efendilerden de pek çok isti’fâde etdi. 1319’da Muharrem Efendi’den mücâz olup Hâcıköyüne avdetle ders-i âm ve 1330 senesi recebinde pederinin irtihâline binâ’en Hâcıköyü müftüsü oldu. Az evvel de Sivas vilâyeti meclis-i umûmîsi a’zâsı olmuşdu.
1336’da teşekkül eden istiklâl hükûmeti tarafından açılan intihâbâtta Amasya meb’ûsu olarak Ankara’ya gitdi. 1339’da Meclis-i Meb’ûsân’ın feshini müte’âkib 1340’da sânîyen Amasya meb’ûsu ta’yîn edilerek eski mevki’ni muhâfaza etdi ve bey unvânını aldı. [101]
Kisve-i ilmiyyesini çıkartıp Cumhûriyet i’lânı, hilâfet-i Osmâniyye ve İslâmiyyenin ilgâsı, Osmanlı hânedânının hudûd-ı millî hâricine tard u ihrâcı, bütün millete şapka iksâsı, tekke ve türbelerin seddi, cevâmi’-i şerîfede cüz-hânlıkların ref’i, medâris-i ilmiyyenin seddiyle tedrîsât-ı dîniyyenin men’i mukarrerâtına iştirâk etdi.
Bu sâyede umduğundan ziyâde nüfûz u servet kazandı. Hân, hamâm, apartman alıp kemâl-i refâh içinde yaşama yolunu buldu. Ancak Başvekîl İsmet Paşa ile araları açıldığından dolayı 1344 senesi intihâbında meb’ûsluktan çıkarıldı.
El-yevm Top-hâne civârında Cihangir Mahallesinde kâ’in apartmanında ikâmet ve kemâl-i âfiyetle te’mîn-i refâh u ma’îşet etmektedir. Âlim, zekî, âkil, natûk, umûr-ı dünyâya vâkıf, müdebbir, hoş-sohbet, tab’an latîf, emsâline nisbetle kerîm ve hânedân-ı âl-i Osmâna düşmanâne bedbîndir. Bu haslet-i mümtâzesinden dolayı ikinci def’a meb’ûs ta’yîn edilmişdi. [102]