Amasyalıdır. Abdullah bin Ali oğludur. Amasya fuzalâsından Mevlânâ Fahreddîn Osmân Çelebi halka-i tedrîsinde [194] vesâir ulemâdan ikmâl-i tahsîl edib ders-i âm ve Devâtdâr Ahmed Paşa’nın zamanında hânkâh-ı Mes’ûdî şeyhi ve vakfı nâzır ve mütevellîsi oldu.
Ba’dehû Amasya vâlisi olan Şehzâde Çelebi Sultân Mehmed’e intisâb edib mevkiini muhâfaza etdi. 805’de Kara Devlet Şâh’ın muhâliflerinden olduğu münâsebetle Topal Timur Hân’ın hafîdî Kara Mehmed Sultân’ın tahkikât için Amasya’ya geldiği esnâda firâr edib Halep vâlisi Emîr Şeyh Müeyyedî’ye ilticâ etdi.
Emîr Şeyh bunun ilim ve fazîletini akıl ve fetânetini takdîr ederek maiyyetinde bıraktı. Ba’dehû nâil-i saltanât oldukda imâm-ı sultânî olup ulemâ-yı Mısrıyye’nin merci’ ve mültecâsı olduğu halde 815’de Şam’da vefât etdi. Kibâr-ı ulemâdan fâzıl, zâhid, gâyet müteşerri’, natûk, elsine-i selâse ile mütekellim bir zât idi. Mahdûmu Salahaddîn Mehmed Çelebi ma’rûfdur.