Amasyalıdır. Meşâhîr-i ulemâdan Mevlânâ Zeyneddîn Siyavuş bin eş-Şeyh Evrân Çelebi bin Doğan es-Selgurî, ed-Divriğî mahdûmudur. Pederi ve ceddi Divriklidir. Ceddi eş-Şeyh Evrân Çelebi Tokat’da ve pederi Amasya’da medfûndur.
Kendisi Amasya’da doğdu. Amasya’da tahsîl-i ulûm [193] edib ders-i âm oldu. Ba’dehû birâderi eş-Şeyh Ali Yârî Çelebi ile Sivas’a gidip Kâdı Burhan’ın himâyesinde kaldı. Hacı Şâdgeldi Paşazâde Devâtdâr Ahmed Paşa’nın emâretinde birâderi ile Amasya’ya avdet etdi.
Hayli müddet tedrîsâtına devam edib Abdurrahman bin Mehmed el-Muslihî Amasya kâdı’l-kudâtı olduğu esnâda Amasya nâibi olarak tanındı. 801’de Kâdı-i Sivas olup sânîyen Sivas’a gitdi. Ancak 803’de Topal Timur Hân’ın Sivas’ı vurmasında kaçıp Amasya’ya ilticâ etdi.
805’de Çelebi Sultân Mehmed Hân’ın Amasya hükümdârı olduğu esnâda müşârün-ileyhe intisâb edib mukarreblerinden olduğu halde 812’de vefât etdi. Meşâhîr-i ulemâ ve kudâtdan idi. Mahdûmu Mevlânâ Şükrullah Çelebi kudât ve müverrihînin ser-efrâzıdır.