Amasyalıdır. 1195 senesi cumâdelulâsında Çayköy Mâlikânesi mutasarrıfı iken vefât eden el-Hâc İbrâhim Ağa bin Ali Ağa bin Mehmed Ağa’nın mahdûmudur. Yeniçeri ve pederinin irtihâlinde mezkûr mâlikâne mutasarrıfı ve ba’dehû Amasya serdârı oldu. [332]
Ba’dehû İstanbul’a gidip Yeniçeri Ocağına yerleşdi. Tedrîcen tefeyyüz ederek 1219 senesi şevvâlinde Amasyalızâde Hacı İbrâhim Efendi’nin himmetiyle kethüdâyeri iken muhzır ağalığıyla dâhil-i katar olup sırasıyla zağarcıbaşı ve 1221’de kul kethüdâsı oldu.
1222 senesi cumâdelûlâsının yirmi dördüncü günü Silistre’de olan ordu-yu hümâyûn içinde yeniçeri ağası Pehlivân İbrâhim Paşa’nın muhâlifleri ictimâ’ edib Silistre ile Karalaş arasındaki adada ikâmet eden ağanın üzerine hücûm u katl etdikleri cihetle receb-i şerîfin evâ’ilinde adaya celb ü da’vet edilerek yeniçeri ağası oldu.
Bir yıldan ziyâde yeniçerilerin zabt ü rabtına dikkat u ihtimâm ederek 1223 senesi cumâdelâhiresinin dördüncü günü tahta cülûs eden Sultân Mahmûd Hân-ı Sânî zamânına kadar mevki’ini hüsn-i muhafaza etdi. Alemdâr Mustafa Paşa’nın vürûduyla cülûs vak’asında mekânet gösterdi.
Ancak sene-i mezbûre recebinin ikinci günü “nezâket-i mizâc-ı vakte nâ-muvâfık” olduğundan bahisle azl edilip [333] çok geçmeden vefât etdi.⁹⁴Vefâtından az evvel uhdesinde bulunan Çayköy Mâlikânesi’ni oğulları İbrâhim, Muslih Ağalara kasr-ı yed ü ferâgat etmişdi. Âkil, müdebbir idi.