Amasyalıdır. Kuyûd-ı vakfiye idâresinde Amasya muhâsebe defterinde mestûr olduğu üzere 1221’de vefât eden Hâfız el-Hâc Ömer Efendi bin el-Hâc Yûsuf Ağa’nın mahdûmu ve Zeynelzâde es-Seyyid el-Hâc Ali Efendi bin es-Seyyid el-Hâc Zeynel Ağa’nın kerîmezâdesidir.⁹⁵
Pederinin hayâtında berâ-yı tahsîl İstanbul’a gidip Dürrîzâde Ârif Mehmed Efendi’ye intisâb ederek tahsîl-i ma’ârif etdi. Müşârün-ileyhin himmetiyle Bâb-ı âlî aklâmından birine girip müşârün-ileyhe dâmâd oldu. Tedrîcen tefeyyüz ederek Ârif Efendi’nin zamân-ı meşîhatinde dîvân-ı hümâyûn hâcegânından olup ba’zı vüzerâya kapı kethûdâsı oldu.
1222’de Yeniçeri efendisi vekîli, 1223’de masraf-ı şehriyârî kâtibi, 1224’de kethüdâ-yı bâb-ı sadâret-penâhî olup 1225’de cizye muhâsebecisi, 1227’de yeniçeri [334] efendisi oldu.⁹⁶ 1230’da kayınbirâderi es-Seyyid Abdullah Efendi’nin meşîhatten azlini müte’âkib azl edildi.
Ba’dehû haremeyn muhâsebecisi olup 1236’da ba’zı ahvâlinden dolayı azliyle Dimetoka’ya nefy edildi. Birkaç mâh sonra afv ü i’âde edilerek 1237’de rûz-nâme-i evvel, 1238 şevvâlinde Karadeniz boğazı nâzırı, ba’dehû Rûmeli ciheti binâ emîni oldu.
1242’de sânîyen haremeyn evkâfı muhâsebecisi olup üç yıl kadar kaldı. 1245’de cizye muhâsebecisi, 1247 senesi şevvâlinde defter emîni ve 1248 senesi zilhiccesinde Mısır Kapı kethüdâsı olduğu hâlde 1249 senesi ramazânında vefât etdi. Eyüp’te medfûndur. Kâtib, müsta’id, ehl-i hizmet idi.
Sultân Selîm ve Sultân Süleyman vakıflarının hazîne defterinde du’â-gûyân sırasında görüldüğü üzere mahdûmu es-Seyyid el-Hâc Eşref Mehmed Efendi 1292’de fevt oldu. Bunun mahdûmları es-Seyyid Mehmed Hasîb, Ahmed Nesîb, Mahmûd Nedîm Beylerdir. Es-Seyyid Nesîb Bey 1318’de [335] ve Hasîb Bey 1321 senesi rebîülâhirinde ve meşâhîr-i vüzerâdan Viyana sefîr-i kebîri es-Seyyid Mahmûd Nedîm Paşa da 1343 senesi rebîülevvelinde vefât etdi. Vânî köyünde medfûndur.