Amasyalıdır. “Çakal Kadı” demekle meşhûr olan İmâdzâdelerden Bedreddîn Mahmûd Efendi’nin mahdûm-ı edîbi olup Amasya fuzalâsından ve hâssaten Hâtib Kâsım Efendi’den ikmâl-i tahsîl ederek ders-i âm ve müderris-i be-nâm oldu.
Atabeg Gâzi müderrisi iken fezâil-i ilmîyye ve ahlâkiyyesiyle iştihâr etdiğinden üstâdının sevkiyle Amasya vâlisi Şehzâde Sultân Ahmed’in heyet-i ta’lîmiyyesine iltihâk ederek musâhabât-ı edebiyyesinden mahzûz olan Sultân-ı müşârün-ileyhin musâhiplerinden oldu.
918’de Sultân Selim Hân’ın taht-ı saltanata cülûsuyla Şehzâde-i müşârün-ileyhin şems-i ikbâli üfûl etdiğinden [162] Amasya’dan kaldırılıp Tire kazâsına ta’yin edildi. Orada kadı olarak kaldı. Ba’dehû Bursa Yenişehir’i kadısı oldu. Kânûnî Sultân Süleyman Hân devrinde Filibe kadısı olup 949 hudûdunda vefât etdi. Fâzıl, edîb, halûk, müteşerri’ bir zât idi. Mahdûmu kibâr-ı evliyâdan Hazreti Bâlî İlhamî Efendi’dir.