Amasya’nın a’yân-ı meşhûresinden olup tercemesi bâlâda yazılan Helvacı el-Hâc İsmail Ağa’nın ahfâdından el-Hâc Abdullah Efendi bin Abdî Ağa bin Hasan Ağa bin Abdî Ağa bin Mehmed Ağa bin el-Hâc İsmail Ağa’nın mahdûmudur.
Hacı Hamza Mahallesi’nde 1289’da doğdu. Temennâ mektebinde kıraat öğrenip 1301’de Rüşdiye mektebine girdi. Bu mektebde beraber okuyup Abdüllatîf Efendi Kütübhânesi ittisâlinde kâin fetvâhânenin fevkânî odasında beraber beytûtet ve tahsîl-i ulûme gayret etdik.
Bir müddet Mecdîzâde Hâfız Abdurrahman Kâmil Efendi’den tederrüs etdikden sonra mahkeme-i şer’iyye ketebesinden oldu. 1324’de zâbıt kâtibi oldu. Başkâtip Hâfız Mehmed Namî Efendi’nin tekâüde sevkinde mahkeme-i şer’iyye başkâtibi ve mahkemenin ilgâsında 1341’de kassâm kâtibi olarak [185] bütün umûr-ı şer’iyye dest-i kifâyetine tevdî edildi.
Bir kaç yıl bu vazîfesine devam edib yeni Kanûn-ı medenî mevki’-i tatbîke kondukda 1345’de tekâüd edildiğinden kendisine bir meşgale olmak üzere zahîre ticâretiyle iştigâl etmekte iken 1352 senesi evâilinde kanser illet-i bî-emânıyla vefât etdiği haber verildi.
Merhûm umûr-ı şer’iyyeye vâkıf, hayırhâh, gâyet vefâkâr, sâdık bir kardaşımdı. Vefâtından pek ziyâde müteellim olmuşdum. Hacı İlyâs Mahallesi’nde ikâmet ederdi. Mahdûmları Ömer Niyazi, Mehmed Efendilerdir. Ömer Niyazi Efendi şümendüfer yolu taahhüdâtında hayli servet edinerek âilesini sevindirdi.