Köprülüdür. Ulemâ-yı kudâtdan Şemseddîn Mehmed Efendi bin Müftü Şücâeddîn Efendi’nin mahdûmudur. Birâderi İmâdeddîn Paşa’nın tersâne emîni olduğu esnâda İstanbul’a gidip devâir-i devletde istihdâm edilerek dergâh-ı âlî kapıcıbaşılarından oldu.
Merzifonî Kara Mustafa Paşa’nın sadâretinde nâil-i ikbâl olup az sonra Eğri Beylerbeyi olarak temâyüz [80] etdi. Ba’dehû Yanova muhâfızı olup bu vilâyetlerde Köprülüzâde Fâzıl Ahmed Paşa’nın hayrât ve evkâfına nezâret eyledi.
1094 senesi şevvâlindeki Viyana inhizâmı üzerine ordu ile beraber Belgrad’a geldi. Bir yıl kadar açıkda kalıp, 1095 senesi zilhiccesinde Beyşehir mutasarrıfı, 1097 senesi evâilinde Tımışvar muhâfızı oldu.
Hayfâ ki Viyana inhizâmı bir tarafdan düşmanların her tarafdan tehâcümünü, diğer tarafdan ordunun iğtişâşını intâc eylediğinden bu tehâcüm ve iğtişâş arasında 1098 senesi rebîülâhirinde vefât etdiği zannolunur. Gayûr, mukdim idi.