Amasyalıdır. Pervâne Bey Câmii imâmı Yumuk Osmanzâde Hâfız Mehmed Efendi bin Yumuk Osmân Efendi bin Hâfız Hasan Efendi bin Mustafa Efendi bin İsmail Efendi bin Pervâne Bey Câmii imâmı Hâce Hasan Efendi mahdûmudur.
1258’de Fethiye Mahallesi’nde doğdu. Evâ’il-i hâlinde dibâğatle iştigâl ederek ba’dehû Malatyalı Sûfîzâde Mehmed Hulûsî Efendi’nin halka-i tedrîsine mülâzemetle ulûm-i Arabîyye’yi öğrendikden sonra fıkıh ve ferâiz okudu. [142]
Usûl-i mertebe üzere ikmâl-i tahsîl edib icâzet aldığından az sonra 1291’de üstâdı Mehmed Hulûsî Efendi Amasya müftüsü oldukda yanında müsevvidi ve emînü’l-fetvâ olarak on iki yıl bu hizmetinde devam etdi. Hayli servet ü sâmân edindi.
Müsevvidliği zamanında inhilâl eden Sungurlu Medresesi müderrisi olup 1303’de üstâdının irtihâli üzerine tedrîs-i fıkh ve ferâize muvâzabet etdi. Bir müddet sonra zuhûr eden yangında medrese yandığından erbâb-ı hayrın iânât-i nakdîyyesi ve kendi himmeti sâyesinde medreseyi tecdîden i’mâr edib vazîfe-i tedrîse devam etdi.
1312 senesi şevvâlinde bir cemm-i ğafîr ile Hicâz’a gidip edâ-yı Hâc etdikden sonra Cidde’ye avdet ederken Cidde mevkiinde koleraya tutulup orada dâr-ı bekâya irtihâl etdi. Meşâhîr-i ulemâdan gâyet fakîh, ferâizde mâhir, Arabiyye’de râcil, vakûr, sâlih, varlığa mâlik bir zât idi.
Mahdûmları Hacı Hâfız Mehmed Tevfik Efendi ile ayyâş-ı meşhûr Hâfız Mehmed Rüşdü Efendi’dir. Uhdesinde olan [143] Pervâne Bey Câmii imâmlığını askerlikten kurtarmak için bu ayyâşa vermişdi.