Amasyalıdır. Meşâhîr-i ümerâdan Şerefeddîn Hamza Bey bin Îsâ Bey bin Süleyman Bey bin İsmâ’îl Bey bin Sunkur Bey’in mahdûmudur. Kurtboğan Mezarlığı’nın ortasında türbesi olan Şerefeddîn Hamza Bey bunun pederidir. Sadr-ı esbak Bâyezîd Paşa’nın âmmizâdesidir.
Amasya vâlîsi iken Sultân Murâd-ı Sânî ümerâsından olup 824’de Sultân-ı müşarün-ileyhin cülûsunda beraber gitdi. Hayli müddet Edirne sarâyı muhâfızı olup 838’de Şehzâde Sultân Ahmed Amasya vâlîsi oldukta lalası olarak avdet etdi.
841’de müşârün-ileyhin irtihâlinde Canik ve havâlîsi emîri olup 857’de İstanbul fethinde bulundu. 860’da Sultân Bâyezîd-i Sânî Amasya vâlîsi oldukta ma’iyyetine me’mûr olup 868 hudûdunda vefât etdi. Mahdûmu Nasûh Bey dâmâd-ı şehriyârî oldu. Bunun mahdûmu Hüsrev Şah’dır.