Amasya müftüsü olup tercemesi yukarıda yazılan el-Hâc Servahdî Mustafa Efendi’nin mahdûmudur. Allâme Ürgüblü Hacı Ahmed Efendi’den ikmâl-i tahsîl edib ders-i âm ve hâciyân u a’yân meclislerine a’zâ olarak “Hacı Servatlıoğlu” demekle iştihâr etdi. 1229 senesi hilâlinde vefât etdi. Ulemâ ve a’yân-ı memleketten idi.
Diğer eşrâftan Kapancızâde el-Hâc Süleyman Ağa bin el-Hâc Hâfız Hasan Ağa da haciyân u a’yân meclislerine a’zâ oldu. Ancak Caniklizâdeler tarafdârı olduğu cihetle Tayyâr Mahmûd Paşa’nın i’dâmından sonra münzeviyyâne imrâr-ı hayât edib 1230 sâline doğru vefât etdi.