Çorumludur. Esbak Amasya müftüsü es-Seyyid el-Hâc [166] Ali Efendi bin Abdulfettâh bin Mehmed’in birâderi es-Seyyid Ahmed’in oğludur. Gençliğinde Amasya’ya gelip amcası sâyesinde nüfûz u i’tibâr kazandı. Ticâretle idâresini te’mîn edib hânedân oldu.
Ba’dehû hâcıyân ve a’yân meclislerine a’za olup 1168 senesi zilhiccesinde nakîbü’l-eşrâf kâ’im-makâmı oldu. 1167’de müteseyyidlerden ba’zı mücrimleri terbiyye etmeye kıyâm eylediğinden mühîn-i sâdât diye sâdâtın gürültüsü üzerine azl edildi.
1170 senesi zilhiccesinde sânîyen nakîbü’l-eşrâf ka’im-makâmı olup bade’l-azl 1177 senesi cumâdelûlâsında sâlisen nakîbü’l-eşrâf ka’im-makâmı oldu. 1178 sa’bânında meclis-i a’yân a’zası olduğu hâlde 1179 senesi zilka’desinde vefât etdi.
Kerîm, halûk, mu’tedil, zî-servet bir hânedân idi. Mahdûmları es-Seyyid Ali, Mehmed Efendilerdir. Dâmâdı meşâhîr-i a’yândan Hacı Efendizâde el-Hâc Ahmed Ağa’dır. Es-Seyyid Ali Efendizâde es-Seyyid Zeynelâbidîn [167] Efendi ve es-Seyyid Mehmed Efendizâde es-Seyyid Abdurrahmân Efendi ile şehir kethüdâsı es-Seyyid el-Hâc Ömer Efendi ma’rûftur. Bunlara “Zeynelzâdeler” dendi.
Hacı Yûsuf Ağazâde Hacı Ömer Ağa Zeynelzâde es-Seyyid Mehmed Efendi’nin dâmâdı olduğu münâsebetle Hacı Ömer Ağa’nın evlâdı olan es-Seyyid el-Hâc Ali, Ahmed, Mehmed Ağalara da “Zeynelzâde” dendi. Es-Seyyid Abdurrahmân Efendizâde es-Seyyid Selîm Sâbit Efendi ricâldendir.
Es-Seyyid el-Hâc Ömer Efendi 1220’de vefât edib mahdûmları es-Seyyid Ali, Mehmed Efendilerdir. Es-Seyyid el-Hâc Mehmed Efendi 1244’de vefâtıyla oğulları es-Seyyid Ömer, Osmân Ağalardır. Es-Seyyid Ömer Efendizâde es-Seyyid Mehmed Efendi ve es-Seyyid Osmân Ağazâde Nalband es-Seyyid Süleyman İzzet Ağa’dır. Bunun oğlu es-Seyyid Kâmil Mehmed Ağa’dır. Alay emîni es-Seyyid Hâfız Ömer Efendi bin es-Seyyid Mehmed bin es-Seyyid Ömer Efendi de 1310’da fevt oldu.