Amasyalıdır. Dergâh-ı âlî çavuşânından Sâlih Ağa bin Darb-hâneci Zeynelâbidîn Ağa’nın mahdûmudur. Tahsîl-i ilm ü kitâbet ederek Sivas defterdârı Amasyalı Ebûbekir Paşa’nın kethüdâsı iken Tokat voyvodası ve Amasya beytü’l-mâl-i âmme ve hâssa emîni oldu.
Ba’dehû İbşir Mustafa Paşa’nın kethüdâsı ve ammizâdesi olan Sâlih Ağa’nın yardımıyla paşaya intisâb edib 1053’de Haleb ve 1054 şa’bânında Sivas defterdârı oldu. Tahsîl-i emvâl işlerinde gayret ü hizmeti görüldüğünden 1056’da Adana beylerbeyi ve Musûl defterdârı oldu.
1057 senesi ramazânının on dokuzuncu günü bâ-hatt-ı hümâyûn Musul Beylerbeyi ve şevvâlinin yirmisinde [165] ilâveten Erbil sancâğı mutasarrıfı oldu.
Çünkü Sivas defterdârı iken Amasya sancâğı mutasarrıfesi olan “Telli Hasekî” demekle meşhûr Sultân İbrâhim’in gözdesi Hümâ Şâh Sultân’a intisâb etmişdi. Bundan dolayı fevka’l-âde parladı.
1058 senesi recebinde Sultân İbrâhim’in hal’iyle şehzâdesi Sultân Mehmed-i Râbi’in cülûsunda müte’essir olup sene-i mezbûre şevvâlinde ma’zûlen Amasya’ya geldi. 1059 senesi rebîülâhirinde Haleb vâlîsi İbşir Paşa’nın arz ü inhâsıyla Teke sancâğı mutasarrıfı ve Haleb defterdârı oldu.
1061’de ma’zûl ve 1062’de İbşir Paşa’nın isyânıyla menkûb olup 1064 senesi zilhiccesinde İbşir Paşa sadr-ı a’zam olduğundan Kıbrıs beylerbeyi oldu. 1065 senesi recebinde İbşir Paşa’nın azl ü i’dâmı üzerine azl edildi. Ba’dehû vefât etdi. Hesâb ve dünya işlerine vâkıf idi.