Amasyalıdır. Amasya a’yânından Müjdecizâde es-Seyyid el-Hâc Hüseyin Ağa bin el-Hâc Yûsuf Ağa’nın mahdûmudur. Gençliğinde hıfz-ı Kur’ân etdikten sonra sipâhî olarak Rus harbine gitdi.
1203’de Çerkes Hasan Paşa kolunda Ruslar’ı püskürtüp yararlıklar gösterdiğinden müşârün-ileyhin silahdârı oldu. Gerek sadâretinde ve gerek eyyâm-ı vezâret ü nektebinde müşârün-ileyhin yanından ayrılmadığı cihetle 1215’de Bender muhâfızı olduğu esnâda dergâh-ı âlî kapıcıbaşılığı rütbesiyle taltîf edildi.
1221’de Ruslar’ın Bender’i ansızın [262]hücûm ederek aldıkları esnâda efendisiyle beraber esîr olup Rusya’ya giderken firâr ve ordu-yı hümâyûna iltihâk etdi. 1223’de muhârebede ibrâz eylediği şecâ’at ve liyâkatına binâ’en bâ-rütbe-i mîr-i mîrânî Erzurum vâlîsi oldu.
1224’de münhezim ve ma’zûl olup sonra Karahisâr-ı Sâhib mutasarrıfı ve 1227’de Yergöğü muhâfızı oldu. Orada tûl-i müddet kalıp hüsn-i muhâfaza etdiğine binâ’en 1232 senesi şevvâlinde rütbe-i vezâretle taltîf edildi. Amasya a’yânından Sa’îd Ağazâde es-Seyyid İsmâ’îl Hakkı Ağa’yı kendisine kethüdâ nasb etdi.
1234 senesi evâ’ilinde hastalandığından emr-i muhâfazayı kethüdâsı deruhde etdi. Sene-i mezbûrenin rebîülâhirinde dâr-ı bekâya irtihâl eylediğinden yerine kethüdâsı müşârün-ileyh es-Seyyid İsmâ’îl Hakkı Ağa bâ-rütbe-i mîr-i mîrânî Yergöğü muhâfızı oldu. Bunun ma’rifetiyle paşanın bütün muhallefâtı bâ-defter-i müfredât Bâb-ı âlî’ye takdîm edildi. Mezkûr defter görüldü.
Vezîr-i müşârün-ileyh şecî’, muhârib, gâzî, müdebbir, metîn bir zât idi. “Çerkes Paşa silahdârı” demekle meşhûr olduğunu Şânîzâde “Vekâyi-nâme”sinde yazıyor. [263] Mahdûmları Mehmed Hilmî, Hasan Hüsnî Beylerdir.