Amasya’nın cenûbunda kâ’in Kızılca karyesi civârında Geyikli nâm-ı diğer Küçük Kızılca karyesinden Sipâhî Mehmed Ağa’nın [423] oğludur. Vâlidesi Hüsâmeddîn Temannâyî evlâdından Fâtıma Hâtun’un vefâtında Hüsâmeddîn vakfına mütevellî olarak Amasya’da ikâmet edib sipâhî oldu.
Köprülü Mehmed Paşa’nın Macaristân harbinde ibrâz-ı şecâ’at ederek iştihâr edib Deli Emîr Mehmed Paşa’nın kethüdâsı olduğundan Amasya sancâğına mükerreren mütesellim ve evkâf-ı Sultâniyeye mütevellî ve Girid muhârebesinde ibrâz-ı liyâkat edib dergâh-ı âlî kapıcıbaşılarından oldu.
On yıl kadar devr-i hidemât ederek 1091’de mütekâ’id olduğu hâlde 1092 senesi evâhirinde vefât etdi. Meşâhîr-i a’yândan şecî’, mukdim, müdebbir bir hânedân idi. Mahdûmları Mehmed, Mustafa Ağalardır. Bunlara ve evlâdına “Geyiklilioğulları” dendi.
Mehmed Ağa Hüsâmeddîn Ağa vakfına mütevellî olup 1121’de vefât etdi. Mahdûmları Abdullah, Ömer, İsmâ’îl Ağalardır. Mustafa Ağa da birâderinden sonra mütevellî olup 1136’da vefât etdi. Bunun mahdûmu Hâfız Süleyman Ağa’dır. Diğer mahdûmu da Hâfız Hasan Ağa’dır. [424]
İsmâ’îl Ağa bin Mehmed Ağa mütevellî olup 1172’de ve bunun mahdûmu Mehmed Sa’îd Ağa 1212’de vefât etdi. Bunun mahdûmları Hâlis İbrâhim Ağa 1231’de ve vezîr Hakkı İsmâ’îl Paşa 1245’de vefât edib Hâlis Ağazâde el-Hâc İsmâ’îl Hakkı Ağa Amasya mütesellimidir. Bunun mahdûmu Mehmed Sa’îd Efendi 1272’de bilâ-veled-i zükûr vefât etdi. Bunun kerîmezâdesi Mîrlivâ İsmâ’îl Hakkı Paşa da 1344 senesi saferinde Üsküdar’da vefât etdi.