Amasyalıdır. 1065’de vefât eden Amasya a’yânından Mehmed Bey bin Kelekci Hüseyin Ağa’nın mahdûmudur. Züamâdan olup 1058’de Amasya subaşılığına ta’yîn edilerek tûl-i müddet bu vazîfesini hüsn-i îfâ etdi.
1069’da Akdağ nâhiyesine subaşı olup nâhiyede zuhûr eden eşkiyânın def’ ü tenkîline me’mûr oldu. Bunu hüsn-i îfâ ve tenkîl-i eşkiyâda ibrâz-ı liyâkât eylediğinden 1071’de [422] Amasya alaybeyi, 1072’de Merzifon voyvodası, 1075’de sânîyen Amasya alaybeyi oldu.
1076’da hüsn-i idâre ve hizmeti takdîr edilerek mîrlivâlıkla Eğin ve 1079’da Sinop sancâkları beyi olup Kandiye muhârebesine me’mûren Girid’e gitdi. 1081’de mecrûhen avdet edib tekâ’üd edilerek 1086’da vefât etdi. Şüc’ân-ı ümerâdan müdebbir bir zât idi. Mahdûmları Mehmed, Alî Beyler ve birâderi Mustafa Bey’dir. Evlâdı yakın zamânlara kadar yaşamaktaydı.