Merzifonludur. Sipâhî Ahmed Ağa’nın mahdûmu olup “Rûz-nâme-i Osmânî”de yazıldığı üzere Köprülü Mehmed Paşa’nın silâhdârı olup müşârün-ileyhin irtihâlinde mahdûmu Fâzıl Ahmed Paşa’nın silahdârı oldu.
Kandiye muhârebesinde şecâ’at ü besâleti görüldüğünden 1082’de Mar’aş Beylerbeyi olup Rûmeli muhârebesine me’mûr oldu. Ba’dehû Trablusşâm, Adana Beylerbeyi, Merzifonî Kara Mustafa Paşa sadâretinde Anadolu Beylerbeyi olup 1092’de vezâretle Rûmeli vâlîsi oldu.
1094’de Viyana önünde harb ederken şehîden vefât etdi. Gâyet cesûr, müdebbir, işgüzâr, muktedir bir vezîr idi. Mahdûmu Abdüllatîf Bey dergâh-ı âlî kapıcıbaşılarından olup 1121’de vefât etdi.