Amasyalıdır. Kibârı ulemâdan Hâtuniye Câmii imâmı ve hatîbi Mevlânâ Hâfız Bünyad Efendi’nin mahdûmudur. Amasya ulemâsından ve hâssaten müftî-yi meşhûr el-Hâc Hızır Efendi’den ahz-ı ulûm ve ikmâl-i tahsîl edib ders-i âm ve bâ’dehû müderris oldu.
1096 senesi şâbânında pederinin irtihâline binâ’en câmi-i mezkûrun hitâbeti kendi uhdesine tevcîh edilib imâmet vazîfesi de imâm-ı sâbık Hâfız Mustafa Efendizâde Hâfız Mehmed Efendi’ye verildi. Ulûm-ı edebbiyede mahareti, fıkıh ve usûlde fazileti der-kâr olduğundan Hızır Paşa müderrisi olmuşdu. [169]
Lâdik ve Köprü gibi ba’zı kasabâta kâdı olup sonra terk-i kazâ ederek tedrîs ve ifâdeyle iştigâl etdi. Evâhir-i ömründe Hakala’da Mehmed Bey Medresesiyle mütekâid olduğu halde 1121 senesi şa’bânının evâhirinde vefât etdi. Âlim, Hâfız-ı Kur’ân savt ü edâsı güzel, edîb, natûk şâir bir zât idi. Mahdûmu es-Seyyid Mustafa Efendi hatîb olup 1124 muharreminde İbrâhim Efendi’ye hitâbeti ferâgat ederek İstanbul’a gitdi.