Amasyalıdır. Hazret-i Pîr İlyâs-ı Halvetîzâde Pîr Alâeddîn Alî Çelebi mahdûmudur. Amcası kibâr-ı ulemâ ve meşâyihten Pîr Abdurrahmân Çelebi’den ulûm-ı şer’iyye ve ma’ârif-i sûfiyyeyi ahz u telakkî ederek müşârün-ileyhin 843’de irtihâli üzerine Gümüşlüzâde tekkesi şeyhi oldu.
Halka va’z ü nasîhat, zikr ü tevhîde muvâzabet ederek fevka’l-âde şöhret buldu. Sarrâclar şeyhi Pîr Sun’ullâh-ı Halvetî’nin irtihâlinden sonra umûmun teveccühlerine mazhar ve mu’tekad-ı enâm olduğu hâlde 858’de dâr-ı kûdse intikâl etdi. Âlim, kâmil, mazınne-i kerâmet, nebî-sîret bir zât idi. Ceddi civârında medfûndur. Mahdûmu Celâleddîn Abdurrahmân Çelebi de meşhûr idi.