Esbak Amasya mütesellimi dergâh-ı âlî kapıcı-başılarından es-Seyyid el-Hâc Osmân Bey bin es-Seyyid el-Hâc Hasan Bey bin el-Hâc Ahmed Bey’in mahdûmudur. 1238’de doğdu. 1256’da asker [159] olup birkaç ay ta’lîmden sonra yüzbaşı, 1258’de binbaşı olarak Amasya’da kaldı.
Çünkü bu esnâlarda devletçe eşrâfzâdelerden zâbit yetiştirmek lüzûmu hâsıl olduğundan askerliği kabûl eden eşrâfzâdeler terakkiyât-ı serîa ile teşvik edilirlerdi. Bunun da iki yıl zarfında binbaşılığı bu teşvîkât-ı âsârından idi.
1263’de taburu diğer bir yere kaldırdığından isti’fâ edib askerlikden çıktı. 1285’de birâderi Ali Beyle beraber müştereken Yörgüç Paşa vakfına mütevellî olup servet ü sâmâna erdi.
1291’de Belediye reisi ve 1293’de meclis-i idâre âzâsı olarak Amasya’nın erkânından olduğu halde 1295 senesi cumâdelâhiresinde vefât etdi. Âkîl, müdebbir, hânedân, edîb idi. Mahdûmu Hasan Hüsnü Bey de 1318’de mütevellî oldu.