Amasyalıdır. İmâmlardan Ahmed Efendi’nin oğludur. Müfessîr-i meşhûr Amasya müftüsü el-Hâc Hızır Efendi’nin halka-i tedrîsinde ikmâl-i tahsîl edib ders-i âm ve fâzıl-ı müşârun ileyhe dâmâd oldu. Üstâdının zamân-ı fetvâsında müsevvid ve fetvâ emîni olduğundan onunla beraber Kıbrıs’a gönderildi.
1072’de avdet ettikde Halfet Gâzi müderrisi ve üstâdının yine müftülüğünde müsevvid ve emînü’l-fetvâsı olup eski mevki’ini buldu. Tedrîse mülâzemet ederek Iydî Bayrâm Efendi’den sonra Sultân Bâyezîd müderrisi olup yevmî seksen akçe vazîfe aldı. [165]
Amasya’da meclis-i a’yân açıldıkda a’zâ olup idârî ve içtimâî işlerle de iştiğâl etdi. Son yıllarda her şeyden ferâgat edib yalnız tefsîr ve hadîs tedrîsâtına ve ibâdete hasr-ı evkât ederek 1112 senesi evâ’ilinde dâr-ı na’îme irtihâl etdi.
Âlim, usûl ü fürû’da mâhir, ulûm-i edebiyyede kâmil, müteşerri’ olup meşâhîr-i fuzalâdan idi. “Hızrî” mahlâsıyla şâir olup edebiyât-ı Arabiyye ve Fârisîde sâhib-i kemâl idi. Mahdûmu Ahmed Mâhir Efendi’dir.