Amasyalıdır. Nakîbü’l-eşrâf kâ’im-makâmı ve esnâf şeyhi es-Seyyid eş-Şeyh Ali Efendi bin mü’ellif-i Tezkire-i Abdî Efendi’nin mahdûmudur. Ulemâdan tahsîl-i ulûm ederek mücâz olup 1112’de pederinin kasr-ı yediyle Abdullah Paşa cüz-hânı ve ba’dehû Hüseyin Ağa vakfı kâtibi oldu.
1127’de pederinin irtihâlinde Ahî Darb-hâneci tekkesi şeyhi ve Pervâne Bey Câmii vâ’izi olup mükerreren meclis-i hâciyâna ve a’yâna a’zâ olduğu hâlde 1159 senesi saferinin on sekizinde vefât etdi.
Âlim, vâ’iz, halûk, nâzik-tabi’at, şâir, sâhib-i temkîn idi. Ceddinin tezkire-i şu’arâsını tezyîl ederek asrının şu’arâsını ve havâdisini cem’ ü tahrîr etdi. Bu eseri kütüb ve evrâk-ı metrûkesi arasında bulundu. Mahdûmları es-Seyyid Abdurrahmân, Abdî, Ahmed Efendilerdir.
Hâfız es-Seyyid Abdurrahmân Efendi, Abdullah Paşa câmii imâmı olup 1197’de vefât etdi. Yerine mahdûmu [68] Hâfız es-Seyyid Ahmed Efendi imâm olup 1234’de vefât etdi. Bunun mahdûmu Hâfız es-Seyyid Mehmed Efendi imâm oldu.
Sâhib-i tercemenin ikinci mahdûmu es-Seyyid Abdullah Abdî Efendi ulemâdan olup Acem Ali Mahallesi’nde Bâlî Bey câmii imâm u hatîbi idi. 1210’da vefât edib mahdûmları es-Seyyid Mustafa, Ahmed Rüşdü Efendilerdir. Hâfız es-Seyyid Mustafa Efendi 1191’de vefât etdiğinden Hâfız es-Seyyid Ahmed Rüşdü Efendi pederinin vefâtında müstakillen câmi-i mezbûre imâm u hatîb oldu.
Üçüncü mahdûmu Hâfız es-Seyyid Ahmed Efendi Çırakcı Mahallesi’nde Hasan Efendi câmi-i şerîfi imâmı olup 1213’de fevt oldu. Bunun mahdûmu Hâfız es-Seyyid Osmân Efendi imâm olup 1223’de vefâtıyla imâmet ve hitâbet Sorukluzâdelere tevcîh edildi.