Benderlidir. Bender dâhilinde Usaya Köyü’nden Hasan bin Gâzi mahdûmu olduğu Şeyh Alizâde es-Seyyid el-Hâc Ahmed Rüşdü Efendi’nin kaydından anlaşıldı. Gençliğinde İstanbul’a gelip tahsîl-i ulûm esnâsında Tokatî eş-Şeyh Mehmed Emîn Efendi’nin hizmet-i şerîfesine mülâzemet etdi.
Müşârün-ileyhin enfâs-ı mübârekesinden istifâde ve riyâzet-hânesinde tekmîl-i sülûk ederek hulefâsından oldu. Ba’dehû şeyhinin emr ü işâretiyle Amasya’ya gelip tarîkat-ı Nakşiyyeyi neşr ve irşâd-ı halka çalışdı. 1169’da Darb-hâneci tekkesi şeyhi oldu.
Ba’zı ricâl-i ilmiyyenin i’tirazâtından dolayı düçâr-ı azl olup 1181’de İmâretarkası’nda Çelebi Efendi tekkesi şeyhi ve Câmi-i Enderûn vâ’izi oldu. Yirmi yıl kadar bu vazîfesini hüsn-i îfâ ederek 1201’de dâr-ı kudse irtihâl etdi. Yörgüç Paşa İmâreti ittisâlinde Kutb Ahmed Efendi yanında medfûndur.
Âlim, âbid, vâ’iz-i meşhûr, müttakî mazınneden [199] bir zât-ı sütûde-simât idi. Silsile-i tarîkatı eş-Şeyh Mehmed Emîn Tokatî, Hâce Ahmed yek-dest-i Mekkî, Hâce Mehmed Ma’sûm Sirhindî vâsıtalarıyla müceddid-i elf-i sâni Hâce Ahmed Fârukî Sirhindî’ye müntehîdir. Hulefâsından Çatal Hâfız Ahmed Efendi yukarıda yazıldı (Kaddesallâhu esrârahum).