Rizelidir. Laz Ahmed Paşa’nın kapıcıbaşılığında kethüdâsı olup 1226 rebîülevvelinde müşârün-ileyhin sadâretinde Mektûbî kalemine girip hulefâdan ve ba’dehû Hâcegân-ı divân-ı hümâyûndan oldu. Ba’dehû sadr-ı müşârün-ileyhin yine kethüdâsı ve 1234 senesi cumâdelûlâsında vefâtına binâen Gümüşhâne emîni oldu.
1236 senesi recebinin dördünde bâ-rütbe-i mîr-i mîrânî boğaz muhâfızı oldu. Ba’del-azl 1242’de Varna muhâfızı, 1243’de Hamîd sancağı mutasarrıfı, 1244’de azliyle müteâkiben Köstendil, 1245’de sânîyen Hamid ve ba’dehû Alâiye sancakları mutasarrıfı ve Silivri muhâfızı oldu. [127]
Bu hizmetinde oldukça yararlık gösterdiğinden Kayseriyye sancağı ilâve-i me’mûriyeti oldu. 1246’da vezâretle Erzurum vâlisi olup senesinde azliyle Laz Ali Rıza Paşa ile Bağdat harbine me’mûr olduysa da hilâf-ı emr-i âlî hareketinden dolayı 1247’de ma’zûlen Amasya’da ikâmete me’mûr oldu.
On yıldan ziyâde mensî bir halde Amasya’da imrâr-ı hayat edib 1258 senesi rebîülevvelinde Bolu müşîri olduysa da 1259 senesi evâilinde azliyle sânîyen Amasya’ya gönderildi. Münâsib bir maâş ile tekâüd edilip 1277 senesinde vefât eyledi.
Amasya’da Mehmed Paşa Kabristânı’nda medfûndur. Seng-i mezârında Sultân Abdülazîz Hân’ın vüzerâsından olduğu yazılıdır! Mehmed Paşa imâretinin arkasında kebîr konağı ve bahçesi Şefik Paşa konağı ve bahçesi diye meşhûr idi. 1310 târihinden sonra veresesinden Ali Rıza Bey satıp târumâr etdi. Yerine hânlar, dükkânlar, kahvehâneler yapıldı. [128]