Amasya civârında İlarslân nâhiyesi eşrâfından Dündarzâde Osmân Bey’in mahdûmudur. Amasya’da Sultân Bâyezîd medresesinde ikâmet ve hıfz-ı Kur’ân etdikten sonra ders-i âm-ı meşhûr Sipâhî Hâfız Ömer Efendi’den tahsîl-i ulûm ederek ders-i âm oldu.
Hacı İlyâs Mahallesi’nde ikâmet ve tedrîs-i ulûma muvâzabet ederek iki def’a talebesine icâzet-nâme i‘tâ edib fevka’l-’âde iştihâr etdi. Her cum’a günü Sultân Bâyezîd câmi-i şerîfinde va’z ü nasîhat ve eyyâm-ı sâ’irede “Tefsîr-i Beyzâvî” tedrîsine mülâzemet ederek 1267 senesi şa’bânında vefât etdi.
Âlim, gâyet fakîh, mütekellim, takrîr u ifâdesi mükemmel [271]hadîs ve tefsîre vâkıf, zâhid, müteşerri’, vâ’iz idi. Elsine-i âmmeda “Hâfız Hâce” demekle meşhûr olup mahdûmları Ni’metullâh, Hasan Vehbî Efendiler kendinden sonra yek-diğerini müte’âkib vefât etdiler.