Amasya eşrâfından Yörgüç Paşa vakfı mütevellîsi Mehmed Bey’in mahdûmudur. Dergâh-ı âlî çavuşânı silkine girip hayli [414] mühim işlerde istihdâm edildi. Bağdâd, Îrân, Girit muhârebâtında ibrâz-ı hizmet ve şecâ’at eylediğinden mîr-livâ olarak devr-i bilâd etdi.
1063’de ceddi evkâfına mütevellî olup ihtiyâr-ı tekâ’üd etdi. Bu hâlde imrâr-ı evkât ederek 1069’da Abazalıların i’dâmı esnâsında vefât etdi. Meşâhîr-i a’yândan hânedân, sahî bir zât idi. Mahdûmları Mehmed, Mustafa Beylerdir.